Charta qua eadem Ermentrudis dat monasterio Cluniacensi terras ad Cuelatum, etc.
Hæc est carta de terra quam dedit Cluniaco, pro sepultura sua, Ermentrudis, mulier Bertardi Brancidunensis, terram scilicet quam habebat ad Cuelatum et ad Colonias, IIII peciolas vineę et II prati, et ad Chessitum I jurnalem de terra, et I peciam prati, et quandam ancillam et filium ejus. De Vuidone autem nepote suo conventum fecit, ut apud Cluniacum sepeliretur, et terram quam ipse puer ex parte Ermentrudis tenebat, si absque herede moreretur, Sancto daret Petro. Testibus Dodone presbitero, et Vuilelmo presbitero, Heenrico quoque et uxore sua.